Трафімаў Сяргей Анатольевіч
Настаўнік вышэйшай кваліфікацыйнай катэгорыі, спецыяліст у галіне біялогіі, хіміі і карэкцыйнай педагогікі. Вопыт працы ў сферы адукацыі складае 40 гадоў.
Нарадзіўся ў г. Полацку Віцебскай вобласці. Скончыў біёлага-хімічны факультэт Віцебскага дзяржаўнага педагагічнага інстытута імя С. М. Кірава, атрымаўшы кваліфікацыю настаўніка біялогіі і хіміі. Таксама скончыў факультэт алігафрэнапедагогікі і лагапедыі Мінскага дзяржаўнага педагагічнага інстытута імя А. М. Горкага, атрымаўшы кваліфікацыю настаўніка і лагапеда дапаможнай школы.
Працаваў настаўнікам біялогіі і хіміі ў Роска-Сялецкай сярэдняй школе Аршанскага раёна, затым — настаўнікам дапаможнай школы № 24 г. Оршы. З 2011 года працуе настаўнікам Цэнтра карэкцыйна-развіццёвага навучання і рэабілітацыі Аршанскага раёна.
Аўтар 78 вучэбных і вучэбна-метадычных дапаможнікаў і каля 130 публікацый. Прымаў удзел у распрацоўцы вучэбнай праграмы па прадмеце «Чалавек і свет» для 1–3 класаў, з’яўляецца аўтарам падручнікаў для гэтых класаў. Удзельнічаў у распрацоўцы праграмы факультатыву «Здоровый образ жизни» для пачатковай школы. Прымаў удзел у стварэнні праграмы па прадмеце «Окружающий мир» для 1–4 класаў школ Расійскай Федэрацыі, у суаўтарстве падрыхтаваў падручнікі і вучэбна-метадычныя матэрыялы па гэтым прадмеце.
Супрацоўнічае з выдавецтвам «Аверсэв» з 2006 года. У рамках сумеснай працы выпушчана серыя дапаможнікаў па вучэбным прадмеце «Чалавек i свет» для 1–4 класаў: кнігі для чытання, рабочыя сшыткі, практыкумы, тэсты і тэматычныя самастойныя работы, вучэбна-метадычныя дапаможнікі для настаўнікаў, алімпіядныя заданні і іншыя выданні.
З 2009 года з’яўляецца членам Саюза пісьменнікаў Беларусі і Саюза пісьменнікаў Саюзнай дзяржавы. Аўтар адзначаны шэрагам літаратурных узнагарод: тройчы станавіўся лаўрэатам Літаратурнай прэміі імя Петруся Броўкі ў намінацыі «Літаратура для дзяцей», удастоены Міжнароднай літаратурнай прэміі імя В. В. Біянкі і прэміі імя Уладзіміра Караткевіча. Узнагароджаны нагрудным знакам «За вялікі ўклад у літаратуру», ганаровымі граматамі і дыпломамі дзяржаўных устаноў і Саюза пісьменнікаў Беларусі.
